දොඩම් විකුණා ලද මුදලින් ගමේ දරුවන්ට පාසලක් තැනූ උදාර මිනිසා

පාසලක් තැනීම උදාර කටයුත්තක් බව ඔබට අමුතුවෙන් කිව යුතු නොවේ. මහජන මුදලින් ඇරඹි අපේ රජයේ පාසැල්, කතෝලික සභාවේ අරමුදලින් නඩත්තු වන පාසැල්, ජාත්‍යන්තර පාසැල් මෙන් ම, පුද්ගලික පාසැල් ද අපේ රටේ විරල නොවේ.

ආර්.අයි.ටී. අලස් ගුරු පියාණන්

ඉහත කී මේ බොහෝ පාසැල්, යම් ජනහිතකාමී දානපතියකු හෝ සංවිධානයක් විසින් මූලිකත්වය ගෙන අරඹා පසුව රජයට හෝ එම සංවිධානයන්ට පවරා දෙන ලද පාසැල් වේ. ලංකාවේ බෞද්ධ පාසැල් ආරම්භ කිරීමට මුල් වූ, පරමවිඥානාර්ථ බෞද්ධ සමාගමේ නිර්මාතෘ ශ්‍රීමත් හෙන්රි ස්ටීල් ඕල්කට් මැතිතුමා, (කොළඹ ආනන්ද විද්‍යාලය, මහනුවර ධර්මරාජ විද්‍යාලය, ගාල්ල මහින්ද විද්‍යාලය, කොළඹ විශාඛා විද්‍යාලය, කොළඹ හා මිනුවන්ගොඩ නාලන්දා විද්‍යාල ඇතුලු ලංකාවේ  බොහොමයක් බෞද්ධ පාසැල්), මේරි මියුසියස් හිඟින්ස් මැතිණිය (කොළඹ මියුසියස් බාලිකා විද්‍යාලය),

ආර්.අයි.ටී. අලස් ගුරු පියාණන් (කොළඹ ඩී.එස්. සේනානායක විද්‍යාලය හා ගේට්වේ ජාත්‍යන්තර පාසැල් සමුහය) මේ සඳහා උදාහරණ වේ.

එහෙත් දානපතියෙකු හෝ කැපී පෙනෙන සමාජ සේවකයක් නොවන, දුප්පත් අහිංසක දොඩම්  වෙළෙන්දෙක් ඇරඹූ පාසලක් ගැන ඇසුවොත් ඔබ විශ්මයට පත් වනු නො අනුමාන ය. මේ කථාව ඇසෙන්නේ ලංකාවෙන් නොව ඉන්දියාවෙනි.

මේ අපූරු මිනිසා නමින් හරෙකලා හජබ්බා (Harekala Hajabba) වේ. ඔහු ඉන්දියාවේ කර්ණාටක ප්‍රාන්තයේ වැසියෙකි. කර්ණාටක ප්‍රාන්තයේ මංගලාරු නම් නගරයෙන් කි.මී. 25ක් පමණ ගිය විට හමුවන හරෙකලා නම් ගමට ආසන්නයේ පිහිටි නිව්පප්දු නම් දුෂ්කර ගම්මානය ඔහුගේ නිජබිම යි.

හරෙකලා හජබ්බා

දිනක් තමන්ගෙන් දොඩම් මිලදී ගන්නට පැමිණි විදේශීය සංචාරකයන් දෙදෙනෙකු ඉංග්‍රීසි බසින් තමන්ගෙන් දොඩම් වල මිල විමසූ විට තමාට පිළිතුරු දී ගත නොහැකි වී එම වෙළඳාම එයින් ම අසාර්ථ වූ බව හජබ්බා පවසයි.

කිසිදා පාසල් ගොස් නො තිබුණු තමාට අධ්‍යාපනයේ වටිනාකම අවබෝධ වුයේ එදා සිදුවීමෙන් ඇතිවූ කම්පනය හා ලැජ්ජාව නිසා බව කියන ඔහු, තමාට අත් වූ ඉරණම යළි කිසිවකුට අත් නොවිය යුතු යැයි සිතා, තම ගමේ දරුවන්ට අධ්‍යාපනය ලැබීමට පාසලක් ඉදිකිරීමට තමන් අධිෂ්ඨාන කරගත් බව කියයි.

එතැන් පටන් ඔහු තමාට දොඩම් අලවියෙන් ලැබෙන "සොච්චම් මුදල" මේ අරමුණ වෙනුවෙන් ඉතිරි කළේ ය. තිදෙරු පියෙකු වු ඔහුගේ මේ ක්‍රියාවෙන් පවුලේ ආර්ථික දුෂ්කරතා උත්සන්න වූයෙන්, හජබ්බාගේ බිරිඳ වූ මයිමෝනා මැසිවිලි නැගුවා ය. එහෙත් හජබ්බා සිය අරමුණ ඇයට පැහැදිලි කර දුන් විට ඈ සිය සැමියාගේ උදාර අරමුණට සහාය වන්නට ඉටා ගත්තා ය.

වර්ෂ 1999 දී හජබ්බාගේ සිහිනය සැබෑවීම ඇරඹුණේ  කුඩා මඩුවක ඉදිකළ අවිධිමත් පාසැලකිනි. මුල් ම ශිෂ්‍ය සංඛ්‍යාව සිසුන් 28ක් විය. ක්‍රමයෙන් පිරිස වැඩි වෙත් දී, හජබ්බා "ටින් බෙලෙක්කයට" ඉතිරි කළ මුදලින් ඉඩම් අක්කර භාගයක් පමණ මිල දී ගත්තේ ය. එහි ඔහු සිය පාසලේ ප්‍රථම විධිමත් පාසැල් ගොඩනැගිල්ල ඉදිකළේ, එම දිනවල දොඩම් වෙළඳාමේ නොගොස් තමනුත් ශ්‍රම දායකත්වය ද ලබා දෙමිනි. එම දිනවල පවුල නඩත්තු කලේ ඔහුගේ වැඩිමහල් පුතා විසිනි.

පසුව ඔහු ප්‍රදේශයේ දානපතියන්ගෙන් ද මුදල් සම්මාදම් කරගෙන, පාසල වැඩිදි්‍යුණු කලේ ය.  

හරෙකලා හජබ්බා සිය පාසැලේ දරුවන් සමඟ

ඔහුගේ මේ සද්කාර්යය ගැන මුල්ම අණාවරණය වුයේ "හෝසා දිගන්නා" නම් ප්‍රාදේශීය පුවත්පතේ පලකල ලිපියකිනි. වසර 2004 දී එම පුවත්පත් සමාගම ඔහුට "වසරේ මිනිසා, Man of the Year" සම්මානය පුදනු ලැබී ය. එමෙන් ම වසර 2009 දී සීඑන්එන් සේවය (CNN Chanel) "සැබෑ විරුවෝ", Real Heroes Award සම්මානයෙන් ද ඔහු පුදනු ලැබී ය.

හජබ්බා සිය උදාර සිහිනය යථාර්යතක් කරගනිමින් වර්ෂ 2012 ජුනි මස 14 වන දා සිය පාසැල උත්සවාකාරයෙන් රජයට භාර දුන්නේ ය. අද මේ පාසැල හජබ්බා පාසල ලෙස හැඳින්වේ.

ජනපති රාම් නාත් කෝවිඳ් මැතිඳු අතින් පද්ම ශ්‍රී සම්මානය ලබා ගනිමින්

තමන්ට කියා ඉන්න හිටින්නට නිවසක් පවා නොමැතිව තිබෙත්දීත් සිය ගමේ දරුවන් වෙනුවෙන් දොඩම් විකුණා ඔහු කල මේ උතුම් ක්‍රියාව අගයමින් ඉන්දීය රජය වර්ෂ 2020 දී ඉන්දීය ජනරජයේ හතරවන ඉහලතම සිවිල් සම්මානය වන පද්ම ශ්‍රී (Padma Sri) සම්මානයෙන් ඔහු පුදනු ලැබුවා. (පසුව ඔහුට සමාජ සංවිධායක් විසින් ලක්ෂ 15ක වියදමින් නිවසක් ඉඳිකර දෙනු ලැබී ය.)

  

අද මුළු ලොව ම හරෙකලා හජබ්බා  හඳුන්වන්නේ අක්ෂර සාන්තුවරයා (Akshara Santa, Santa of Letters) යන ගෞරවනීය නාමයෙනි.

උදාර පුද්ගලන් බිහිවීමට බලපාන්නේ ධනය, බලය, උගත්කම, සමාජ හෝ ආර්ථික තත්වය නොව, මිනිස් සිතේ උපදින උදාර සිතුවිලි හා නොබසුබස්නා වීර්යය බව හරෙකලා හජබ්බා නිහඬව ම අපට පවසයි. ඔහුගේ මේ කතාව අපේ දරුවන්ට ආදර්ශයක් වේවා !.

(තොරතුරු හා ඡායාරූප අන්ත්ජාලයෙනි)

සටහන

යූ.ඒ. නදීක තනුජය රම්‍යසිරි විජේරත්න
නිසි බලධාරී
අස්වාන දහම් පාසල
2022-04-09